ဝဏ္ဏပထဇာတ် (ဗောဓိသတ်ဒှ်ညးဗၞိက်)
နူအပဏ္ဏကဇာတ်ဂှ် ပတွဵုတုဲ ဗွဲသန္တိကနိဒါန် သဗ္ဗဇာတ်အိုဿီု ကျာ်တြဲတွံရ၊၊ ဝဏ္ဏပထဇာတ်ဝွံ ကျာ် တြဲပဒတဴ ပ္ဍဲဇရေၚ်ဍုၚ်သာရဝှ် ပ္ဍဲဘာဇေတဝန်၊ ပဟိုတ်ကဵုခမဳမွဲ ပၟဝ်ဓဝ်ခမဳ ထောံကၠေံလွဳတုဲ ဝဏ္ဏပထ ဇာတ်ဝွံ ကျာ်တြဲတွံ၊၊
အတိက်တေံ ဍုၚ်ဗာရာဏသဳ သၟိၚ်ဗြဟ္မဒတ္တပ္ကၚ်ရၚ်၊ ပ္ဍဲရးကသဳကရး ဗောဓိသတ်ပိုဲ ဒှ်တၞောဝ်သကိုပ် သာ၊ ဒှ်မၞိဟ်တုဲ ဇၞော်အာဗဗွဲလၟေၚ် အာစိုပ်ဒဒှ်ဗၠာဲ၊ ပဂကောံကဵုကောန်သာမသုန်ကၠံကွဳစောတ်တုဲ ဂၚေၚ်အာရ၊၊ မၞုံတြဴစှ်ောယုတ်မွဲယောဇနာသဒှ် အာစိုပ်ကန္တာဗတဳမွဲဂှ် (ဗတဳတံဂှ်) ဇိပ်ကၠိပ်လောန် သ္ကေံ လဝ်ပ္ဍဲတဲ ပြဟ်စှ်ေအာဟွံမံၚ်သက်က်၊၊ ဗတဳဂှ် စးဂမ္တဴတ္ၚဲတုဲ ညံၚ်ညးမဗတဳလဝ်လ္ၚပၟတ်ကီု တၞဟ်နသ လိုန်အာဂှ် ဟွံသၟဟ်ရထဟေၚ်၊၊ ဟိုတ်သာ်ဂှ် ညးမဗတဳကွာ်တရဴတံဂှ် မပ္တံဝတ္ထုကၠေၚ်လ္ၚဴ, ဍာ်, အှ်ော, သ္ၚုတံဂှ် မ္ဒးပဍိုက်ဏာကွဳစောတ်တုဲ ကာလဗ္တံ မ္ဒးအာရောၚ်၊၊ ဗောဓိသတ်ဟီုကဵုသာလတူကွဳဂှ် ကဵု ကၠောန်ကဏာထးတုဲ တြဴဗ္တံအာတဴရ၊၊ ပ္ဍဲကဵုပထမအရှိုန်မတိုန်ကၠုၚ်ဂှ် ပဒိုအ်ကွဳဟာပ်စတုဲ ပ္ဍဲသမၞိၚ်ကွဳဂှ် ဟေၚ် တန်တဴရ၊၊ ဒးကာလသၟဝ်တ္ၚဲ ဟာပ်စပုၚ်သွတုဲ တ္ၚဲပၠိုတ်တိတ္ၜောဟ် ဗ္ဂန်ကေတ်ကွဳစောတ်တုဲ ဇက်အာတဴရ၊၊ တြဴဂှ်တုန် ညံၚ်ညးလှောၚ်မှာသမိတ်ကီု သကိုပ်သာဂှ်တုန် ရံၚ်သၟန်သၞံၚ်နက်သတ်တုဲ ဗၞတ်တြဴမသုန်စှ်ောဒ္စိတ်ယောဇနာဂှ်အာတုဲ “သိက်သ္ပသ္ဂောံဗၠးတိတ် နူကန္တာဗတဳညိရော” သာ်ဝွံဗောဓိ သတ်ချပ်တဴရ၊၊
ပ္ဍဲကာလဂှ် ဍာ်အှ်ောလေဝ်အိုတ်အာ၊ ပ္ဍဲကွဳဂတဂှ် ဗောဓိသတ် ကဵုညးလးလဝ်သၞာတုဲ ဗောဓိသတ် ဍိုက်အာရ၊၊ ဗောဓိသတ်ရံၚ်အာနက်သတ် ဗွဲဒိုဟ်တေံဒိုဟ်ဝွံတုဲ ဇက်အာရ၊၊ ဗောဓိသတ်ပၠန် ဟိုတ်ဒှ် တြဴအဓါန်မဂၠိၚ်သ္ၚောဲ မအောန်ကဵုလဟိၚ် ဍောၚ်ၜိုတ်ဂှ်ဒှ်တုဲ နလဟိၚ်မဇၞော် လှိၚ်တဴရ၊၊ ဂၠဴဂမၠိုၚ်တုန် ကလေၚ်စဴကၠုၚ်တုဲ ဆဗၞတ်ညးမွဲကီု ဟွံဂွံတီသက်သက်၊ လုကဴမွဲဗ္တံ ဂၠဴဂမၠိုၚ်ကလေၚ်စဴကၠုၚ်ရ၊၊ မှာလီ သြၚ်တုန် ပ္ဍဲပယာံပထမအရှိုန်မတိုန်ဂှ် လကိုတ်ၚုဟ်တုဲ ရံၚ်ၚဳမွဲသၟန်နက်သတ် တီဒဒှ်ဂၠဴဂမၠိုၚ် ကလေၚ် စဴကၠုၚ် ဗောဓိသတ်သ္ဂးရ၊ “ယွံမၞးတံ၊ ကွဳစောတ်ပိုဲကလေၚ်စဴကၠုၚ်အိုတ်ရ” ဗောဓိသတ်သ္ဂးတုဲ သီုညး ဂမၠိုၚ်ကတဵုရံၚ်တုဲ “ဇက်ကလေၚ်ကၠုၚ်ပၠန်တေံရ” ညးဂမၠိုၚ်ဂး၊၊ “ယွံမၞးတံ၊ စိုပ်ကၠုၚ်ဒၟံၚ်ဒၞာဲတရေံရောၚ် သွံ” ဂးတဴအိုတ်ရ၊၊ ပ္ဍဲမကလေၚ်ကၠုၚ် ပထမအရှိုန်လေဝ်တိုန် ပ္ဍဲကာလဂှ် ညးဂမၠိုၚ်ဟီုတဴရၚ်သ္ကံအိုတ် ရ၊ “ယွံမၞးတံ၊ ဍာ်အှ်ောပိုဲလေဝ်ဟွံမွဲ၊ လၟုဟ်ဝွံပိုဲကလေၚ်အိုတ်တုဲရ” ဂးတုဲ တလိုဟ်တဴကွဳစောတ် အိုတ်ရ၊၊ ညးဂမၠိုၚ်လုပ်အာသၟဝ်ကွဳဇကုဇကုအိုတ်ရ၊၊ ပ္ဍဲကာလဂှ် ဗောဓိသတ်ချပ်ဗ္စာရဏာ “အဲဝွံ ထောံ ကၠေံလွဳတုဲ ညးဂမၠိုၚ်ဝွံ ဒှ်လေၚ်အိုတ်ရသွံ” ဗောဓိသတ်ချပ်တုဲ ဒိုဟ်တေံဒိုဟ်ဝွံ ဗောဓိသတ်သ္ၚဳမွဲ ညာတ်ကၟတ်ဓဇိပ်မွဲကမဵု “ကမတ်ဓဇိပ်ဝွံ ပဟိုတ်ဒယာပ်ဍာ်တုဲရောၚ် မတိုန်တန်ဒှ်ရ” ဗောဓိသတ် ချပ်တုဲ ကော်ညးဂမၠိုၚ် ကဵုခဲါဗၞတ်တြဴစှ်ောဟတ်သဒှ် ခဲါစှ်ေတုဲ ဒးတၟံလးမွဲ၊ ပ္ဍဲကာလဂှ် ညးဂမၠိုၚ် ညာတ်တုဲ ထောံကၠေံလွဳ တိုန်ကၠုၚ်ရ၊၊ ဗောဓိသတ်ချပ် “သၟဝ်တၟံဝွံ ဍာ်နွံတန်ဒှ်ရ” ဂးတုဲ စှ်ေအာ ကမၠိုၚ် လိုန်တၟံလး ကလၚ်ရံၚ်ဇၟောဝ်ဍာ် မဇွောဝ်အာမိၚ်တုဲ တိုန်ကၠုၚ်တုဲ ဟီုကဵုသ္ကံဇကုရ၊၊ “ယွံ ကောန်ပိုဲ၊ မမွဲနွံလွဳပရာဂှ် အဲညာတ်ရ၊ ယာံမထောံကၠေံလွဳတုဲ ဇန်တံဂမၠိုၚ်စိုပ်လေၚ်တုဲရ၊၊ မကၠေံ စိုတ်ပကီုလွဳ တၟံလးပ္ဍဲကတိုၚ်ဝွံဂှ် ဗတိုက်ဗပါ်ထောံကၠေံညိ” ဂးတုဲ ဗောဓိသတ်ဒုၚ်ကဵုလေံဒုဲပသဲ မၚ် ဗၠာဲစှ်ေအာရ၊၊ နကဵုလေံဒုဲဂှ် မၚ်ဗၠာဲတက်ဗပါ်ကၠေံတၟံဂှ် ၜါလပါ်ဟေၚ်၊၊ ပ္ဍဲကာလဂှ် ဍာ်ပတိုက်တိုန် တၟာ တၞံတာဗၠာဲ ညးဂမၠိုၚ်ဂွံသုၚ်ဟုံလာၚ်ဖဲလဲအိုတ်ရ၊၊
တဝ်လ္ၚောဝ်ကွဳစောတ်တံဂှ် တှ်ေဗါ်ကေတ်တုဲ တောံပုၚ်သွ ဂွံစတဴအိုတ်ရ၊၊ ဂၠဴလေဝ်ဂွံကမတ်ဍာ် ညး ဂမၠိုၚ်အိုဟ်တၟိုဟ်စိုတ် ဗွဲမလောန်၊၊ ပ္ဍဲဒၞာဲကမၠိုၚ်ဂှ် သွက်ညးဂွံညာတ် ဗောဓိသတ်ကဵုခၞံဇၞောဝ်မွဲ သွက် ညးဂွံညာတ် ကွက်လဝ်ဇၞောဝ်ဂှ်ရ၊၊ ဗောဓိသတ်သီုညးဂမၠိုၚ် ဇက်အာဒၞာဲဌာန်အမှတ်စိုတ်ဂှ် စိုပ်အာတုဲ သွံရာန်ဗၞိက်ဇိက် ဂွံပရဲမွဲကဵုၜါ မွဲကဵုပိပန်တုဲ ကလေၚ်စဴဌာန်ဒမံၚ်ဇကုအိုတ်ရ၊၊ ညးမသုန်ကၠံကွဳဂှ် မွဲ ဗၞတ်အယုက်ဂှ်တန်ဒၟံၚ်တုဲ ဗွဲကုသဵုဇကုခိုဟ်ဟွံခိုဟ်ဂှ် စဴအာဘဝပလိုက်ရ၊၊ ဗောဓိသတ်တုန် ဂွံပ္တုဲဒါန်ရ၊၊ ဗွဲအတိုၚ်ကုသဵုဇကုခိုဟ်ဟွံခိုဟ်ဂှ် စဴအာဘဝပလိုက်အိုတ်ရ၊၊
ဒှ်ကျာ်တုဲ ဂလာန်မရဴဝွံ ကျာ်တြဲတွံ၊ “ယွံခမဳတံ၊ ပူဂဵုမဟွံဂွံလၞုဟ်ဂှ် ဍေံမဒှ်ဌာန်အမှဲ မသက်ကဵုဍာ် ကီု ပ္ဍဲတြဴကန္တာဗတဳဂှ် ကလိဂွံဍာ်တုဲ ရဴဇန်တံမကလိဂွံတသိုက်ကီု၊ ညံၚ်သာ်ဂှ်ရ မစိုန်သကီုတဴကေုာံ ဒြ ဟတ်ညာန် ဒြဟတ်ကာယ ဒြဟတ်လွဳဂှ် မဟွံဂွံလၞုဟ်ဂှ်ဒှ်တုဲ ကုခမဳဂှ် အရိယဓမ္မမတွံဂး အရဟတ္တ မဂ္ဂညာန်တုဲ ဝိပဿနာဇျှာန်ဂှ် ကလိဂွံဟေၚ်” ရဴဝွံကျာ်တွံကဵုခမဳဂမၠိုၚ်ရ၊၊ “ယွံခမဳ၊ အတိက်တေံ တ လအဲမွဲမၞုံကဵုလွဳတုဲ ညးဂမၠိုၚ်ဂွံတသိုက်အိုတ်ရ၊၊ လၟုဟ်ဂွံဆဵုသာသနာအဲ နိယာနိက ဇိုန်ကဵုသွဝ်ဗြီုနိဗ္ဗာန် ရောၚ်၊၊ မူပတလအဲထောံကၠေံလွဳရော” ကျာ်ဂးတုဲ ကျာ်တြဲဗစိုပ်သစ္စပန်ရ၊၊ ပ္ဍဲလ္အိတ်သစ္စပန်ဂှ် ခမဳ ထောံကၠေံလွဳဂှ် ဂွံဒှ်အရှန်ရ၊၊ ကောန်သာဗၞိက်မတုဲတေံဂှ် ကၠုၚ်ဒှ်ပုရိသာတ်အဲလၟုဟ်ဝွံရ၊၊ နာဲသာဗၞိက်မ တုဲတေံဂှ် ကၠုၚ်ဒှ်အဲကျာ်လၟုဟ်ဝွံရ၊၊
